Паэзія юраўскага цыклу

Вялі дзеўкі карагод...

Запісана ў в. Пагай Жыткавіцкага раёна

ад А. К. Лазарчук (1905 г. н.).

 

Вялі дзеўкі карагод,

З карагодам напярод.

Дзе карагод ходзіць,

Там жыта родзіць,

А дзе не бывае,

То там палягае.

Ой, то ж карагод -

Сам Бог напярод.

Дай, маці, ключык,

Не магу я адамкнуці

Да расою адпусціці.

Радзі, божа,

Ды на жыта,

Ды на пшаніцу,

Ды на ўсяку пашніцу.

Запісала Папкова Л. ў 1974 г.

Юр’я! Добры вечар!

Запісана ў в. Соўкі Пастаўскага раёна

ад Ф. В. Мядзвецкай

 

Юр’я! Добры вечар!

Юр’я! Устань рана!

Юр’я! Пусці расу!

Раса – для конікаў,

Траўка – для каровак,

Пырнік – для авечак.

Запісала Макруш М. у 1991 г.

Юр’я, падай ключы!..

Запісана ў в. Пажарцы Пастаўскага раёна

ад С. Талайка

 

Юр’я, падай ключы!

Юр’я, падай ключы

– Матка, каторыя?

Матка, каторыя?

– Што расу адмыкаці,

Што расу адмыкаці,

А траву выпускаці,

А траву выпускаці.

Запісала Мацвійчук Г. у 1989 г.

 

А мы Юр’я ўспамінаем...

Запісана ў в. Камары Віцебскага раёна

ад Н. І. Зэлікавай

 

А мы Юр’я ўспамінаем,

Бога ўзвелічаем.

Дай, Божа, ключы ад замка,

Адамкнуць зямлю сырую,

Ды на добрае жыта, пашаніцу

Ды на ўсякую пашніцу.

Запісала Радзюкова А. ў 1991 г.

 

Юр’я! Падай ключы...

Запісана ў в. Соўкі Пастаўскага раёна

ад Ф. В. Мядзвецкай

 

– Юр’я! Падай ключы.

– Мамка, каторыя?

– Сынку,земляныя.

Юр’я! Атамкні зямлю.

Юр’я! Пусці расу.

Расу для каровак,

Траўку для конікаў,

Гігель для свіначак,

Смычка – то для бычка,

Пырнік – для гусачак.

Запісала Макруш М. у 1991 г.