8 жніўня
Гэты дзень у маёй фальклорнай практыцы стаў у нейкім сэнсе сенсацыйным. Як я зразумела, нам можна запісаць і іншыя жанры фальклору ў якасці дадатковых адзінак. Па гэтай прычыне я ўпершыню адышла ад задання збіраць фальклорную прозу і дазволіла сабе запісаць ад майго ўжо ў нейкай ступені пастаяннага інфарманта ў Елцы Ганны Віктараўны Дубатоўка (1950 г.н., беларуска, сярэдняя адукацыя, мясцовая) прыпеўкі. Трэба сказаць, што падчас запісу прыпевак ад Ганны Віктараўны ў мяне значна палепшыўся настрой. Напоўненыя гумарам, гэтыя фальклорныя адзінкі даволі хутка кладуцца не толькі на паперу, але і на памяць.
56. “Мой муж – галава…”
Мой муж – галава,
А я яго шыя.
Ім кручу, куды хачу,
Хай талеркі мые.
Заўвага: пазаабрадавая лірыка – прыпеўка.
57. “Я хацела выйсці замуж…”
Я хацела выйсці замуж,
Маць каровы не дае.
А жаніх такі папаўся,
Без каровы не дае.
Заўвага: пазаабрадавая лірыка – прыпеўка.
58. “Прыехалі ка мне сваты…”
Прыехалі ка мне сваты
На сівой кабылі.
Усё дабро маё забралі,
А мяне забылі.
Заўвага: пазаабрадавая лірыка – прыпеўка.
59. “Музыкант у нас адзін…”
Музыкант у нас адзін.
Давай, дзевачкі, дадзім.
Музыканту трэба даць,
Весялей будзе іграць.
Заўвага: пазаабрадавая лірыка – прыпеўка.
60. “Ах, бабачкі, яко дзіва…”
Ах, бабачкі, яко дзіва,
Я на печы заблудзіла.
Абняла валёнак,
Думала мілёнак.
Заўвага: пазаабрадавая лірыка – прыпеўка.
61. “А сягоня ўначы заблудзіла на пячы…”
А сягоня ўначы заблудзіла на пячы.
Цап-цап за мяшок,
Думала, што жанішок.
Заўвага: пазаабрадавая лірыка – прыпеўка.
62. “А мой мілёнак у лясу…”
А мой мілёнак у лясу
Спаймаў рыжую лісу.
А з маёй фігураю
Ды трэба чарнабурую.
Заўвага: пазаабрадавая лірыка – прыпеўка.
63. “Ішоў кум агародам…”
Ішоў кум агародам,
Кума вуліцаю.
Кум трос петухом,
Кума – курыцаю.
Заўвага: пазаабрадавая лірыка – прыпеўка.
Дастаткова пасмяяўшыся, з добрым настроем мы развіталіся з Ганнай Віктараўнай. Але на гэтым нашы сустрэчы не спыняцца. Наперадзе заўтрашні дзень.