Набліжаюцца Каляды, таму, каб стварыць святочны настрой, мы прапануем Вам некалькі вясёлых калядак з фондаў лабараторыі.

Калядкі блізка

Запісана ад Юркавай Н. Ц. (1932 г.н.)

у в. Ліпа Буда-Кашалёўскага раёна

Гомельскай вобласці

Калядкі блізка,

Каўбаскі нізка,

Святы вечар!

Дайце каўбасу –

Дамоў панясу,

Святы вечар!

Дайце другу –

З’ем на лугу,

Святы вечар!

Дайце трэцю –

З’ем пад клеццю,

Святы вечар!

Запісаў А. Гіруцкі ў 1973 г.

 

Калядзін, калядзін

Запісана ад Казачок Г.І. (1927 г.н.)

у в. Глушкавічы Лельчыцкага раёна

Гомельскай вобласці

Калядзін, калядзін,

А я ў бацькі адзін.

Па калена кажушок –

Вынесь, дзядзя, піражок!

Як не дасі піражка,

Дайце грошай паўмяшка.

Як не дасце грошай,

Паб’ем усе тарэлкі,

Ложкі, вілкі паляцяць

Па завулачкам.

Запісала Р. Кавалёва ў 1974 г.

 

Прыйшла каляда

Запісана ад Сухаверка О. А. (1932 г.н.)

у в. Лышча Пінскага раёна
Брэсцкай вобласці

Прыйшла каляда

На канец раждзяства.

Дай Бог таму,

Хто ў гэтам даму.

З каласка – піражок,

Надзялі яго Бог

Жыццём, быццём,

Багаццем.

Запісала Т. Аляшкевіч у 1970 г.

 

Павяду я казла ды за ручанькі

Запісана ад Запарожац З.Г. (1908 г.н.)

у в. Чаплін Лоеўскага раёна

Гомельскай вобласці

 

Павяду я казла ды за ручанькі,

Прывяду я казла к дубоваму кусту,

Дам я казлу мучыную лусту.

Стану я казла біць, караці,

Стану я казла праўду пытаці:

– Раскажы, казёл, як бабы ваду носяць,

Раскажы, казёл, як дзеўкі носяць.

Запісала І. Шэпелева ў 1980 г.

 

Раждзяство раждзественскае

Запісана ад Лац В.Ц. (1914 г.н.)

у в. Растаў Акцябрскага раёна

Гомельскай вобласці

Раждзяство раждзественскае
Маё дзела дзеравенскае:

Давай каўбасу –

Дамоў панясу.

Не дасі каўбасу –

Хату разнясу.

Запісала Г. Касцюкевіч у 1978 г.

Болей можна даведацца ў раздзеле "Святы" нашага сайта (перайсці па спасылцы)

Вучэбна-навуковая лабараторыя беларускага фальклору

Адрас электроннай пошты folkndl@yandex.ru


Адрас: 220030, Рэспубліка Беларусь, г.Мінск, вул. К.Маркса, дом 31, п.39.
 

Тэлефон: 380-57-46

(з рэгіёнаў Беларусі: 8-017-3805746, з замежжа: +375 17 3805746)

 

Прыём наведвальнікаў:

пн-пт: з 9.00 да 17.00

(перапынак з 13.00 да 14.00)